У традыцыйнай культуры беларусаў расліны фарміруюць асяроддзе пражывання чалавека, у той жа час яны з’яўляюцца важным фрагментам духоўнай культуры беларускага народа.
Культ раслін вядомы ў многіх народаў свету, у тым ліку з самых старажытных часоў у беларусаў. Яго водгалас захаваўся да нашых дзён у фальклорных паданнях, казках, песнях, а таксама ў прадметах дэкаратыўна-прыкладнога мастацтва. У сістэме традыцыйнай народнай культуры важнае месца займаюць міфалагізаваныя вобразы розных раслін. Усе яны ў старажытнасці мелі сімвалічную ролю. Трэба адзначыць, што расліны не толькі давалі чалавеку энергію, прытулак, але яны здзіўлялі і захаплялі яго веліччу, моцнасцю, хараством, водарам лісцяў і інш. Ідэальным месцам на зямлі ўяўляўся рай — сад пладовых дрэваў, які даваў чалавеку ўсё для жыцця.
Выстава «Раслінны матыў у традыцыі беларусаў: тэкстыль, побыт, фальклор» раскрывае глыбіню ўзаемадзеяння беларусаў з прыродай праз раслінныя малюнкі і арнаменты ў разнастайных сферах жыцця.