Міністэрства культуры Рэспублікі Беларусь
Дзяржаўны літаратурна-мемарыяльны музей Якуба Коласа
ПРЭС-РЭЛІЗ
Музейная акцыя да Міжнароднага дня роднай мовы “Урок у музеі”
21 лютага 2024 года а 13 гадзіне Дзяржаўны літаратурна-мемарыяльны музей Якуба Коласа запрашае далучыцца да музейнай акцыі, прымеркаванай да Міжнароднага дня роднай мовы “Урок у музеі”.
Мова — душа народа, векавая памяць многіх пакаленняў, наш галоўны нацыянальны скарб. Міжнародны дзень роднай мовы ‒ свята, якое з 2000 г. адзначаецца штогод 21 лютага з мэтай заахвочвання моўнай разнастайнасці і шматмоўнай адукацыі і спрыяння ўсведамленню моўных і культурных традыцый, якія грунтуюцца на ўзаемаразуменні, цярпімасці і дыялогу.
Народны паэт Беларусі Якуб Колас − адзін з заснавальнікаў сучаснай беларускай мовы і новай беларускай літаратуры. За некалькі месяцаў да смерці паэт напісаў свой знакаміты ліст-заклік аб крытычным стане беларускай мовы, дзе адзначыў: “Найвялікшым духоўным багаццем народа з’яўляецца яго мова. У мове адлюстроўвалася гісторыя народа, яго працоўнае жыццё, яго барацьба, яго смутак і радасць, яго прырода, яго любоў і гнеў”.
Удзельнікі музейнай акцыі “Урок у музеі” павінны будуць напісаць дыктоўку па творах Якуба Коласа і здагадацца, з якога твора ўзяты ўрывак. Акрамя таго, кожны з удзельнікаў атрымае магчымасць паспрабаць свае веды па жыцці і творчасці Якуба Коласа, а таксама беларускай мове і літаратуры ў інтэрактыўнай “Гульні ў словы”.
А ў 14 гадзін адбудзецца творчая сустрэча з вядомым беларускім пісьменнікам Генадзем Аўласенкам. Удзельнікі, якія напішуць дыктоўку на дзесяць балаў і будуць актыўна ўдзельнічаць у свяце, атрымаюць памятныя сувеніры ад музея.
САРДЭЧНА ЗАПРАШАЕМ!
Адрас музея: г. Мінск, вул. Акадэмічная, 5
Тэл. для даведак: 270-17-02